Kabhi kabhi ek sawal dil ke beech baith jaata hai aur chupchaap humein andar se thaka deta hai —Kya main kabhi life mein successful ho paungi?
Yeh sawal sirf ek thought nahi hota, yeh roz ke roz humare saath uthta hai, humare saath kaam karta hai, aur raat ko humare saath hi so jaata hai. Main bhi roz yahi sochti thi. Shayad hadd se zyada sochne se hi success mil jaaye. Shayad aaj koi client mil jaaye. Shayad aaj thode zyada views aa jaaye. Shayad koi pyaara sa comment hi kar de jo yeh bata de ki “haan, tum sahi direction mein ho.”
1. Jab Sochna Mehnat Se Zyada Ho Jaata Hai
Main itna sochne lagi thi ki kaam karna bhi pressure ban gaya. Har notification ka wait, har refresh mein umeed, aur har silence mein disappointment. Kabhi lagta meri koshish hi kaafi nahi hai. Kabhi lagta shayad mujhme hi koi kami hai. Din ka zyada hissa isi uljhan mein nikal jaata tha — kyun result nahi aa rahe?
Sach yeh hai ki jab hum overthink karte hain, hum apni energy ka bada hissa khud ko doubt karne mein laga dete hain, kaam ko grow karne mein nahi.
2. Mehnat Kar Rahi Thi, Par Khud Ko Credit Nahi De Rahi Thi
Main mehnat kar rahi thi, lekin khud ko kabhi yeh bolkar shabashi nahi di ki “tum apna best de rahi ho.” Hamesha yahi laga ki jab tak result nahi aata, tab tak effort ka koi matlab nahi. Yeh soch dheere dheere confidence ko khokhla kar deti hai.
Hum aksar bhool jaate hain ki effort bhi ek achievement hota hai — khaaskar tab, jab koi dekh nahi raha hota.
Ek baat hmesha khud ko yaad dilana,
Jo khamoshi aaj saath hai, wahi kal jawab degi,
Tu rukna mat, teri mehnat ek din awaaz degi.
3. Comparison Ne Sabse Zyada Thakaaya
Social media par kisi ka success dekhkar lagta tha ki sab kuch mere alawa sabko mil raha hai. Kisi ke clients, kisi ke views, kisi ke comments — aur mere paas sirf wait. Comparison ne meri journey ko bohot heavy bana diya.
Par sach yeh hai ki har insaan ka timing alag hota hai. Jo aaj chamak raha hai, usne bhi kabhi andhere mein kaam kiya hoga.
4. Ek Din Achanak Soch Badli
Ek din achanak maine khud se kaha —“Main poore efforts daal rahi hoon. Apni limit ke hisaab se nahi, balki apni capacity se zyada dene ki koshish kar rahi hoon. Agar main itna kar rahi hoon, toh phir guilt kis baat ka?”
Us din maine yeh decide kiya ki main apna kaam poori imaandari se karti rahungi. Result ka bojh roz roz apne dil par nahi rakhungi.
5. Bhagwan Par Chhod Dena Haar Nahi Hota
Jab maine yeh soch liya ki “baaki bhagwan dekh lenge,” tab mujhe ek alag hi sukoon mila. Yeh soch haar nahi thi, yeh trust tha. Trust ki main apni taraf se kuch kam nahi kar rahi. Trust ki jo mere control mein hai, main usse poori shiddat se kar rahi hoon.
Kabhi kabhi control chhodna hi sabse badi strength hoti hai.
6. Dheere Dheere Din Nikalna Seekh Liya
Pehle har din ek pressure jaisa lagta tha. Ab har din ek chance lagta hai — seekhne ka, behtar hone ka, aur thoda strong banne ka. Result abhi bhi instant nahi aaye, lekin main ab khud se lad nahi rahi.
Aur yeh change sabse bada result tha.
7. Success Ka Matlab Sirf Views Ya Clients Nahi
Maine samjha ki success sirf numbers ka naam nahi hai. Success yeh bhi hai ki tum haar ke baad bhi khud ko utha pao. Success yeh bhi hai ki bina guarantee ke bhi tum kaam karte raho. Success yeh bhi hai ki tum khud par bharosa karna na chhodo.
Shayad ek din clients aayenge, views bhi badhenge, comments bhi milenge. Par jab woh din aayega, tab main sirf successful nahi houngi — main ready houngi.
Agar tum bhi isi phase se guzar rahe ho, toh yaad rakho:
Tumhari mehnat bekaar nahi jaa rahi. Tumhari koshish tumhe andar se strong bana rahi hai. Aur jo strong hota hai, uska waqt zaroor aata hai — bas thoda der se, par gehra asar chhod kar jata hai.
As James Clear explains, long-term success is built on small daily habits, not overnight results.
Umeed Par Chalti Ek Khamosh Journey
Aaj nahi toh kal sahi, par ujaala zaroor aayega,
Tu chalti reh bas, tera waqt bhi muskurayega.
Ruk Kar Khud Se Ek Zaroori Sawaal Poochiye
Thoda sa ruk kar sochiye — kya jo aaj aap accept kar rahe hain, wahi aap deserve karte hain?
Comments mein apna experience ya ek chhota sa thought share kijiye.Shayad aapki baat kisi aur ke liye clarity ban jaaye ✨